सुर्य मावळला ....

आज उदय पळसुले पंचतत्वात विलीन झाले ! किती सहज लिहिले मी ...इतके का सोपे असते असे विलीन होणे ?

पाहिलेला  मृत्यु कधी प्रचंड दुःख , कधी हळहळ , तर कधी मनाला हुरहूर लावुन जातो .

उदय सरांचे जाणे हुरहुर लावुन गेले ...

माझी आणि त्यांची गेल्या वीस वर्षाची ओळख .. पहिल्यांदा आमच्या जुन्या कंपनी मध्ये आम्ही भेटलो ती भेट अजुनही छान आठवते  , त्या कंपनी मध्ये एकूणच मराठी वातवरण कमी .. आम्ही बोटावर मोजण्या इतके कमी मराठी लोक ... नवीन डायरेक्टर म्हणुन उदय आले .. ओळख झाली " कुलकर्णी म्हणजे कुठला तु ?" मी म्हंटले "औरंगाबाद चा " " वा छान " तिथुन आमचे सुरु जुळले ... मैत्री म्हणणे आगाऊ पणाचे होईल ... पण एकूण वेगळे आणि छान नाते जमले .

नोकरी सोडुन त्यांनी स्वतः ची कंपनी चालु करायचा निर्णय घेतला ... आणि तो निर्णय यशस्वी केला ..पुढे त्या कंपनी मध्ये अगदी बोटाला धरून म्हणतात तसे मला आणले .

त्या पुर्वी पण भेटी गाठी होतंच होत्या .. पण परत एकत्र काम करत गेलो तसे उदय सर अजुन उलगडत गेले ..

मराठी वर मनस्वी प्रेम ... मराठी साहित्याचा प्रचंड अभ्यास ..त्या बरोबरीने इंलिश भाषेवर विलक्षण प्रभूत्व ... बरोबरीने इंग्लिश साहित्याची तेवढीच माहिती ... सावरकरवादी विचार सरणी म्हणजे ओघानेच हिंदुत्ववादी सडे तोड विचार .. इतर धर्मा बद्दल तेव्हढाच अभ्यास ..बोलताना सहजतेने कुराण अथवा बायबल चे दाखल देत असत  !

इतिहास मोगला पासुन पेशव्या पर्यंत मेंदुत फीट बसलेला . थोडक्यात काय तर राजकारण , समाज कारण , साहित्य , क्रीडा कुठल्याही विषया करता चालता बोलता Encyclopedia...उत्तम खाण्याची आवड ...

लहान पण नारायण , सदाशिव पेठेत गेल्या मुळे स्वभावातला पुणेरी बेरकी पणा ...पुण्याच्या सगळ्या पाऊल खुणा अगदी मुखोद्गत !

गेली ४०-४५ वर्षे न चुकता रुपाली वर जाणारा यांचा ग्रुप ..मध्यन्तरी कुठल्याश्या चॅनेल ने त्याची ' रुपाली या संस्थे " बद्दल मुलाखत घेतली होती .. पुण्यात रुपाली हे रेस्टॉरंट नसुन ती संस्था आहे असे उदय सरांचे मत होते ...

लहान पण तसे गरिबीत गेले ... वाड्यातील दोन खोल्यात राहुन , शिक्षण घेत .. टिळक टॅंक वर स्विमिंग चॅम्पियन झाले .. शिक्षण पुर्ण करून २५ वर्षे  मर्चंट नेव्ही मध्ये नोकरी करत कॅप्टन पदावर पोहोचले ..नोकरी मुळे सगळे देश फिरून झाले.

आयुष्याच्या दुसऱ्या इंनिग मध्ये entrepreneur झाले ..

प्रचंड बुद्धिमत्ता ,  analytical  skill , vision , out of the box thinking या सगळ्या मुळे यश न मिळेल तर नवल होते ... २००० सालच्या भारतीय कंपनी चे  २०१६ मध्ये फ्रेंच कंपनी मध्ये विलीनीकरण केले...

प्रचंड बुद्धी , पैसा असुनही राहणी अतिशय साधी ..पाय नेहमीच जमिनीवर ... अशा लोकांवर लक्ष्मी आणि सरस्वती कायम प्रसंन्नच असते !

या दोघी प्रसन्न असल्या तरी नियती हे एक कोडे आहेच ना ?

काही वर्षा पुर्वी बोन कॅन्सर चे निदान झाले .. पहिल्यांदा भीती , निराशे मुळे अक्खे कुटुंब कोलमडले ..मग सुरु झाला कॅन्सर शी लढा .. आणि नंतर झाला " कॅन्सर माझा सांगाती " म्हणजे वस्तुस्थिती स्वीकारून केलेली मैत्री ... त्या नंतर जगलेले प्रचंड पॉझिटिव्ह आयुष्य !!

आज तो लढा संपला ... हे सगळे पाहुन ती नियती पण आज कदाचित आसवे गाळत असेल !!

आयुष्यातल्या खुप गोष्टी करायच्या राहुन जातात .. खुपदा वाटायचे उदय सरांना एकदा वाकुन नमस्कार करावा .. पण आम्ही प्रोफेशनल लाईफ चे बुरखे पांघरलेले लोक  कायम जर तर  चा विचार करत असे निर्णय नाही घेऊ शकत ...आज त्यांच्या निश्चल पायावर डोके ठेवताना ही हूर हुर लागुन गेली ....

उदय सर तसे देव धर्म आणि कर्म कांड न मानणारे .. माझा आहे विश्वास ...म्हणुन त्यांच्या आत्म्याला सदगती देवो हीच ईश्वराला प्रार्थना ...

बिपीन कुलकर्णी